دموع التماسيح بنكهة التشبيح

العالم ظالم ظالم ظالم!! تصوروا مالهم هم إلا سوريا الأسد ... سوريا المقاومة والممانعة ... سوريا الصمود والتحدي.

ما أظلمك يا عالم!! الافتراء والكذب دينك والهدف؟ الإطاحة بالنظام الصامد المقاوم الممانع!!

أطلعوا لأكاذيب الجزيرة المندسة: قالوا بالأمس قتل 30 في حمص!! كيف صاروا 30؟ كل اللي ماتوا بالأمس 28 فقط لا غير، وأحدهم من إخواننا الشبيحة قتلوه غدراً وغيلة وهو يشبح على أبناء شعبه (الله يرحمه المسكين)، وهذا خطأ متعمد من الجزيرة بدها تبالغ بالاندساس حتى يثور الشعب أكثر وأكثر وتدمر البلد.

كل الحق على الشيخة موزة، لولا أنها تغار من السيدة أسماء الأسد وانجازاتها الوطنية ما كانت الجزيرة الخنجر المسموم في خاصرة الأمة.

ومن كذبهم صور مسيرة الأمس قالوا أنها في حماة وبالأخير طلعت في إدلب!! ليش حكوا هيك؟ بتفكروا أنه خطأ بريء؟ أسألوا برنار ليفي فهو بيخطط لكل كلمة وكل حرف يبث على الجزيرة، حتى عطسة مذيعة الجزيرة أمس لما كان المدافع عن سوريا الأسد بيحكي كانت عطسة مندسة ومقصودة وبتعليمات من ليفي هذا، علشان تقطع حبل أفكار المتحدث وتشوشه!!

"العمى عليهن" دايما بيجبوا صور القتلى وصور الجرحى، ويعيدوا ويزيدوا فيها، شو بدكن من بثها؟ ليش بتشوشوا على الدولة السورية؟ كأنكن ما عمركن في حياتكن شفتوا قتلى وجرحى!! هيك الحياة ناس تولد وناس تعيش وناس تموت، وناس تموت على فراشها كما تموت البعير وناس تموت في ساحات الوغى، شوفوا الجانب المشرق، لولا الشبيحة ما ماتوا شهداء!!

والأمر والأنكى هو المسبات والتكفير على سيادة الرئيس الدكـ توربشار، وأكثر من هيك فيه واحد "مجرم بن مجرم" شبهه بهتلر!! "العمى بقلوبكن" وشو يعني لو قتل ألف واحد أو ألفين، بيظل مسلم موحد يشهد أن لا إله إلا الله، يعني نجيب الناتو يقتلهم أحسن؟ يا عمي شجعوا الصناعة الوطنية، كل شيء مستورد!! إذا الموت بدنا نستورده من الخارج شو ظل للصناعة المحلية؟

والجريمة الأكبر بدهم من بشار يرحل!! "العمى ما أوقحكن!" وليش سموها سوريا الأسد؟ هلأ تقبلوا أنه يجي شخص لبيتكنم ويقوللكُن أرحلوا؟ ليش يرحل بشار؟ أرحلوا أنتو!! مش سوريا ملكه ورثها من أبوه؟ راح تضيع سوريا من بعده، وراح تجوعوا وتضيعوا وتتشردوا بدونه، مشكلتكُن أنكن بتسمعوا لقنوات الاندساس والافتراء.

نحنا بنعرف أنه سوريا فيها فساد ورشاوى وتعذيب وقمع، بس مش مبرر للمطالبة برحيل السيد الرئيس الدكـ تور بشار؟! مالكم كيف تحكمون!! كله علشان خاطر ألف أو ألفين ماتوا؟!؟ إحنا كل الشعب فدا بشار، إحنا ما بدنا شي بدنا بشار وبس والباقي خس.

بس بحب أطمئن الشيخة موزة والقرضاوي والعرعور "إننا صامدون وسننتصر حتى لو اضطررنا لإبادة الشعب السوري، فهذا لا يهمنا ولن يردعنا، المهم أن تنتصر سوريا الأسد على كل المندسين وعملاء الإمبريالية والرجعية العربية، عاشت سوريا الأسد وليسقط الشعب المندس".